Günün şiiri: Işk Da'vîsin Kılan Kişi Hiç Anmaya Hırs u Hevâ — Yunus Emre

'Işk evine girenlere ayruk ne meyl ü ne vefâ

Girçek 'âşık olan kişi anmaya dünyâ-âhiret
'Âşık degüldür ol kişi yüriye 'izzeti kova

Her kim 'izzetden geçmedi 'âşıklık bühtândur ana
Hergiz girdügi yok durur 'ışkıla 'izzet bir eve

Diliyile 'ışk diyenler bilmediler 'ışk neydügin
Benüm cevâbum sen eyit 'ışka 'izzet midür bahâ

İzzet ü erkân kamusı bunlardur dünyâ sevgüsi
'Işkdan haber eyitmesün kim dünyâ 'izzetin seve

Dünyâ vü 'izzet 'ışkıla bunlar sâz-kâr olmadı
Vallah nükte benüm degül 'ışk hâzırdur görmez revâ

Her kimde kim 'ışk varısa ayruk ne sıgar ol yire
Dost döşegine geçemez at u katır yâhûd deve

Bu cümle 'âşık olanlar 'ışkıla geldiler bile
Müşâhadeye gark olan düşmeyiserdür ol eve

Yûnus'ı 'âşık diyüben zinhâr özenüp gelmenüz
Çok bezirgân ziyân ider varıcagız ırak çava

Şair hakkında

Yunus Emre: 13. yüzyılın sonu ile 14. yüzyılın başında yaşamış, Anadolu'da Türkçe tasavvuf şiirinin öncüsü sayılan şair.

Metin: Vikikaynak, “Işk Da'vîsin Kılan Kişi Hiç Anmaya Hırs u Hevâ” (telif süresi dolmuş eser, kamu malı).

Kaynak: Vikikaynak